បន្ទាយមានជ័យ: ដើម្បីឆ្លើយតបទៅនឹងស្ថានភាពអាកាសធាតុ ក៏ដូចជាគ្រោះធម្មជាតិដែលតែងតែកើតមានជារៀងរាល់ឆ្នាំ ជាពិសេសនៅក្នុងភូមិសាស្ត្រខេត្តបន្ទាយមានជ័យ ដែលតែងតែទទួលរងគ្រោះដោយសារទឹកជំនន់ជារៀងរាល់ឆ្នាំ លោក អ៊ុំ រាត្រី អភិបាលខេត្តបន្ទាយមានជ័យ បានលើកឡើងថា អាជ្ញាធរខេត្តបន្ទាយមានជ័យ បានត្រៀមរួចជាស្រេចទីទួលសុវត្ថិភាពសម្រាប់ជួយសង្គ្រោះប្រជាពលរដ្ឋដែលរងផលប៉ះពាល់ដោយសារទឹកជំនន់។លោកអភិបាលខេត្តបន្ទាយមានជ័យ លើកឡើងបែបនេះនៅក្នុងកិច្ចប្រជុំសាមញ្ញលើកទី៥០ អាណត្តិទី៣ របស់ក្រុមប្រឹក្សាខេត្តបន្ទាយមានជ័យ នៅថ្ងៃទី០៤ខែសីហា ឆ្នាំ២០២៣។លោក អ៊ុំ រាត្រី បន្តថា ជាបទពិសោធន៍កន្លងទៅខេត្តបន្ទាយមានជ័យ ក៏ដូចជាក្រុង-ស្រុកទាំង៩ ជាពិសេសតំបន់ដែលតែងទទួលរងការជន់លិច អាជ្ញារធបានត្រៀមរួចរាល់ជាស្រេច នូវទីទួលសុវត្ថិភាពជូនប្រជាពលរដ្ឋស្នាក់នៅបណ្តោះអាសន្ន នៅពេលមានទឹកជំនន់កើតមានឡើងនៅរដូវវស្សានេះ។ មួយវិញទៀតលោក ក៏បានជំរុញណែនាំដល់កងកម្លាំងពាក់ព័ន្ធគ្រប់ស្ថាប័ន ត្រូវត្រៀមឱ្យបានរួចជាស្រេចនូវឧបករណ៍ជួយសង្គ្រោះ ដើម្បីចេញអន្តរាគមន៍នៅពេលមានទឹកជំនន់កើតមានឡើង។ការដាក់ចេញនូវវិធានការនេះឡើង ដោយសារតែមួយរយៈពេលថ្មីៗនេះបណ្ដាខេត្តមួយចំនួនពិសេសខេត្តជាប់សមុទ្រទទួលរងជំនន់ទឹកភ្លៀង ដែលបង្កធ្វើឱ្យមានការជន់លិចផលដំណាំ និងផ្ទះសម្បែងប្រជាពលរដ្ឋ នៅក្នុងខេត្តមួយចំនួន នៃព្រះរាជាណាចក្រកម្ពុជា៕អត្ថបទ៖ ជា ថន

ភ្នំពេញ៖ ស្ថានភាពទឹកស្ទឹងព្រែកត្នោត ក្នុងភូមិសាស្រ្តខណ្ឌដង្កោ ក្រោយពីមានការហក់ឡើងរយៈពេល ២ទៅ៣ថ្ងៃមកនេះ បានស្រកចុះទៅវិញលែងជាក្ដីបារម្ភហើយ ខណៈការស្រកចុះខ្លាំងនៅថ្ងៃទី ៣ ខែសីហានេះតែម្ដង។ នេះបើតាមការលើកឡើងរបស់មន្រ្តីមូលដ្ឋានដែលបន្តតាមដានស្ថានភាពទឹកជាប្រចាំថ្ងៃ។ លោក លឹម សំបូរ ចៅសង្កាត់រងទី១ សង្កាត់ស្ពានថ្ម ថ្លែងពេល​កំពុងត្រួតពិនិត្យស្ថានភាព​ទឹកជា​មួយមន្រ្តីមកពីថ្នាក់ខណ្ឌថា ​ឈានមកដល់ថ្ងៃទី៣ខែសីហា ឆ្នាំ ២០២៣នេះ ស្ថានភាពកម្ពស់​ទឹកស្ទឹងព្រែកត្នោត ដែលហូរកាត់ក្នុងភូមិសាស្រ្តខណ្ឌដង្កោ ​រាជធានីភ្នំពេញ បានស្រកចុះទៅវិញ​លែង​បង្កជាក្ដីបារម្ភ។ លោកបន្តថា ទោះជាយ៉ាងណាមន្រ្តីមូលដ្ឋាន​នៅតែបន្តតាមដានស្ថានភាពទឹក​ទោះមានការស្រក​ចុះក្ដីពីព្រោះបញ្ហាគ្រោះធម្មជាតិ ​គឺមិនអាចឃើញ ​ដឹងមុនបានទេ ​ដូច្នេះត្រូវប្រុងប្រយ័ត្នជានិច្ច ជាពិសេស ចាប់ពីខែ វិច្ឆិកា ឬខែធ្នូ ទើបផុតក្ដីបារម្ភពីបញ្ហាទឹកជំនន់។ លោក លឹម សំបូរ សង្ឃឹមថា ជំនន់ឆ្នាំនេះ ​មិនជន់លិចធ្ងន់ធ្ងរដូចប៉ុន្មានឆ្នាំមុនទៀតនោះទេ ខណៈអាជ្ញាធរ​បានជួសជុល ​និងសាងសង់ផ្លូវសងខាងស្ទឹង ​ខ្ពស់ជាងមុន ថែមទាំង​មានការបុកដែកចុះទៅក្រោមថែមទៀតផង។ សូមជម្រាបថា រយៈពេលប៉ុន្មានថ្ងៃមកនេះ​ គឺមានការជន់លិចនៅតាមបណ្ដាខេត្តមួយចំនួន រួមមាន៖ ខេត្តកំពត ខេត្តកែប ​ខេត្តកំពង់ស្ពឺ ជាដើម។ ចំពោះទឹកស្ទឹងព្រែកត្នោត ដែលបានហក់ឡើង​កាលពីថ្ងៃទី ១ និងថ្ងៃទី ២ សីហាម្សិលម៉ិញ ខណៈជំនន់នេះមានប្រភពមកពីខាងលើដែល​សំដៅលើខេត្តកំពង់ស្ពឺ៕អត្ថបទ៖ គឹមហុក  

ស្ថានភាពគ្រោះមហន្តរាយក្នុងខេត្តមណ្ឌលគិរី នៅថ្ងៃ២ ខែសីហា ឆ្នាំ២០២៣ +ស្រុកកោះញែក៖ -នៅត្រង់ចំណុចស្ពានអូរជីមៀត បានស្រកចុះឃើញតួស្ពានបេឡេត៍(អាចធ្វើចរាចរណ៍ឆ្លងកាត់ទៅមកបានចំពោះម៉ូតូ និងរថយន្តធុនតូច)។ +ស្រុកកែវសីមា ជំនន់ទឹកភ្លៀង បានជន់លិចចំនួន៣ ឃុំ ក្នុងនោះ៖ -ឃុំស្រែឈូក៖ បានខូចខាតផ្លូវប្រវែង២០០ម៉ែត្រ ដែលជាផ្លូវគម្រោងមូលនិធិឃុំ, ខូចខាតដំណាំកសិកម្មចំនួន ៤១ ហិកតា ស្មើនឹង៣៤ គ្រួសារ ប៉ុន្តែមិនមានការជន់លិចចូលដល់ផ្ទះប្រជាពលរដ្ឋទេ។រហូតមកដល់បច្ចុប្បន្ននេះទឹកបានស្រកចុះមកនៅកម្រិតធម្មតាវិញ។-ឃុំស្រែខ្ទុម៖ បានប៉ះពាល់ដល់ភូមិចំនួន ៥ ភូមិ មានការជន់លិចចូលផ្ទះប្រជាពលរដ្ឋចំនួន ៧១ខ្នងផ្ទះ ក្នុងនោះរងគ្រោះស្រាលចំនួន ៥១ខ្នងផ្ទះ និងរងគ្រោះមធ្យមចំនួន២១ ខ្នងផ្ទះ និងមានការលិចលង់ផលដំណាំប្រជាពលរដ្ឋចំនួន ៣៣ហិកតា។រហូតមកដល់បច្ចុប្បន្ននេះទឹកបានស្រកចុះមកនៅកម្រិតធម្មតាវិញ។-ឃុំស្រែព្រះ៖មានការជន់លិចចូលផ្ទះប្រជាពលរដ្ឋចំនួន ១០ខ្នងផ្ទះ មានការលិចលង់ផលដំណាំប្រជាពលរដ្ឋចំនួន ៨ហិកតា និងខូចខាតផ្លូវនៅឃុំស្រែព្រះអស់ប្រវែង២០០ម៉ែត្រ។ រហូតមកដល់បច្ចុប្បន្ននេះទឹកបានស្រកចុះមកនៅកម្រិតធម្មតាវិញ។ +ស្រុកអូររាំង ៖ទឹកបានហូរច្រោះបណ្តាលឱ្យមានការបាក់ស្រុតផ្លូវ និងដាច់ផ្លូវនៅចន្លោះគីឡូម៉ែត្រលេខ៩១ ដល់គីឡូម៉ែត្រលេខ៩៩ ផ្លូវជាតិលេខ៧៦A ចន្លោះពីស្រុកអូររាំង ទៅស្រុកកែវសីមា (ចំណុចអូរងើយ)ដែលផ្លូវត្រូវបានកាត់ផ្តាច់ និងខូចខាតទាំងស្រុងមិនអាចធ្វើដំណើរបានគ្រប់មធ្យោបាយយានយន្តគ្រប់ប្រភេទ។  

នៅថ្ងៃទី០៤ ខែសីហា ឆ្នាំ២០២៣ ឯកឧត្តម គន់ រ័ត្នមុនី អភិបាលរង និងជាប្រធានលេខាធិការដ្ឋានគ្រប់គ្រង់គ្រោះមហន្តរាយខេត្ត បាទបានដឹកនាំ មន្ត្រីលេខាធិការដ្ឋានគ្រប់គ្រងគ្រោះមហន្តរាយខេត្ត សហការជាមួយរដ្ឋបាលឃុំបឹងព្រួល ស្រុកត្បូងឃ្មុំ  បានចុះពិនិត្យស្ថានភាពទឹកជំនន់ និងពិនិត្យឧបករណ៍វាស់ទឹក (ទេពមច្ឆា) រួចបន្តចុះពិនិត្យទីទួលសុវត្ថិភាពនៅឃុំបឹងព្រួល  សម្រាប់ត្រៀមបម្រុងជួយសង្គ្រោះប្រជាពលរដ្ឋរងគ្រោះដោយទឹកជំនន់ បន្ទាប់បន្តដំណើរចុះពិនិត្យស្ថានភាពទឹកទន្លេមេគង្គ នៅក្នុងឃុំទន្លេព្រែកអាជី និងឃុំកោះពីរ ស្រុកក្រូចឆ្មារ ខេត្តត្បូងឃ្មុំ។

កែប៖ ភ្លៀងធំមួយមេបន្ថែមទៀតនាថ្ងៃនេះ បានធ្វើឱ្យទីតាំងខ្លះបន្តជន់លិច ជាមួយគ្នានេះអាជ្ញាធរខេត្តកែប ក៏កំពុងបន្តដោះស្រាយករណីជំនន់ទឹកភ្លៀងមិនធ្លាប់មាននេះ នៅតាមបណ្តាទីតាំងដែលជាចាត់ទុកជាកន្លែងហានិភ័យ ក្នុងនោះអភិបាលខេត្តកែប ក៏បានបញ្ជាឱ្យគ្រឿងចក្រ ចុះកាយបើកផ្លូវទឹកមួយទីតាំងបន្ថែមទៀត ស្ថិតនៅសាលារៀនអនុវិទ្យាល័យពងទឹក ក្នុងឃុំពងទឹក ស្រុកដំណាក់ចង្អើរ ខេត្តកែប ដើម្បីផ្តល់លទ្ធភាពឱ្យសាលាអាចបន្តបើកថ្នាក់រៀនបាន។លោក​ សោម ពិសិដ្ឋ បានផ្តល់បទសម្ភាសន៍នាថ្ងៃទី៣ ខែសីហា ឆ្នាំ២០២៣នេះ បានឱ្យដឹងថា ស្ថានភាពជំនន់ទឹកភ្លៀងនៅខេត្តកែបពេលនេះ មានសភាពធូរស្រាលឡើងវិញក្រោយបានជន់លិចចូលដល់ក្នុងផ្ទះពលរដ្ឋប្រមាណជាង២ពាន់គ្រួសារ ក្នុងចំណោមពលរដ្ឋជាង៩ពាន់គ្រួសារ ដែលទទួលរងឥទ្ធិពលនៃជំនន់ទឹកភ្លៀង កាលពីអំឡុងចុងខែកក្កដា កន្លងទៅនេះ។ គិតត្រឹមថ្ងៃនេះ នៅទីតាំងខ្លះបន្តការជន់លិចក្នុងកំរិតស្រាល តែក្នុងនាមអាជ្ញាធរយើងបន្តការដោះស្រាយ ដោយប្រើធនធានសរុប មធ្យោបាយសរុប និងកម្លាំងសរុបដែលខេត្តមាន។យ៉ាងណាលោកអភិបាលខេត្តស្នើឱ្យអ្នកពាក់ព័ន្ធទាំងអស់បន្តតាមដានឱ្យបានហ្មត់ចត់ជុំវិញគ្រោះធម្មជាតិលើកនេះ ជាពិសេសសុខទុក្ខប្រជាពលរដ្ឋ ដោយមិនត្រូវទុកឱ្យពលរដ្ឋណាម្នាក់អត់បាយដោយសារជំនន់ទឹកភ្លៀងនេះឡើយ ហើយក៏សំណូមពលរដ្ឋរួមសហការណ៍គ្នាជាមួយអាជ្ញាធរ ក្នុងការឆ្លងកាត់ការលំបាកលើកនេះ។យោងរបាយការណ៍របស់រដ្ឋបាលខេត្តកែប បានឱ្យដឹងថា ជំនន់ទឹកភ្លៀងលើកនេះ ខេត្តកែបបានខូចខាតផ្ទះសម្បែងពលរដ្ឋ និងហេដ្ឋារចនាសម្ព័នមួយចំនួន តែមិនមានគ្រោះដល់ជីវិតនោះទេ ក្នុងនោះក្រុងកែបប៉ះពាល់លំនៅឋានទូទាំងក្រុងចំនួន២.២១៩ខ្នងផ្ទះ ខូចខាតផ្លូវលំ៧ខ្សែ ស្មើនឹង៥.០០០ម៉ែត្រ អំបិលខូចខាត ១.៥០០តោន និងប៉ះពាល់ដំណាំ១២០ហិកតា។ ស្រុកចំណាក់ចង្អើរ ប៉ះពាល់លំនៅឋានចំនួន ៤៧៩គ្រួសារ ស្មើនឹង៤៦៥ខ្នងផ្ទះ ប៉ះពាល់ដំណាំ ៥៨៨ហិកតា ក្នុងនោះទឹកហូរច្រោះប៉ះពាល់ផ្លូវលំចំនួន១៦ខ្សែ៕អត្ថបទ៖ ង៉ុង សាន់

ខេត្តសៀមរាប៖ នាព្រឹកថ្ងៃទី០២ ខែសីហា ឆ្នាំ២០២៣ ស្ថិតនៅតាមដឹងស្ទឹងស្ពានក្អែក ខាងលិចទីបញ្ជាការដ្ឋានយោធភូមិភាគទី៤ ឯកឧត្តម ឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៤ បានអញ្ជើញចុះត្រួតពិនិត្យសកម្មភាពហ្វឹកហាត់ និងកម្លាំងត្រៀមអន្តរាគមន៍នៅនឹងកន្លែង របស់កងប្រតិបត្តិការរុករក នឹងង្គ្រោះគ្រោះមហន្តរាយលេខ៧០៤ យោធភូមិភាគទី៤  និងត្រួតពិនិត្យសម្ភារៈបច្ចេកទេស មធ្យោបាយ ដើម្បីបម្រើឱ្យការជួយសង្គ្រោះបានទាន់ពេលវេលាជូនប្រជាពលរដ្ឋជួបគ្រោះមហន្ដរាយផ្សេងៗ ដែលកើតមានឡើងក្នុងភូមិសាស្ត្រទទួលខុសត្រូវ។ ឯកឧត្តម មេបញ្ជាការយោធភូមិភាគទី៤ បានដាក់បទបញ្ជារយ៉ាងម៉ឺងម៉ាត់ដល់កម្លាំងត្រៀមអន្តរាគមន៍របស់ កងប្រតិបត្តការរុករក នឹងសង្គ្រោះគ្រោះមហន្តរាយលេខ៧០៤ និង គ្រប់បណ្ដាអង្គភាពចំណុះទាំងអស់ ដើម្បីត្រៀមលក្ខណៈចល័តអន្តរាគមន៍ និងជួយសង្រ្គោះអោយបានទាន់ពេលវេលា ដល់ប្រជាពលរដ្ឋរងគ្រោះដោយគ្រោះមហន្តរាយផ្សេងៗ ដែលកើតមានឡើងជាយថាហេតុ។ ឯកឧត្តម ឧត្តមសេនីយ៍ឯក ពៅ ហេង មេបញ្ជាការយោធភូមិភាគទី៤ មានប្រសាសន៍ផ្តាំផ្ញើរ និងកោតសរសើរដល់ នាយទាហាន នាយទាហានរង និងពលទាហានទាំងអស់ ដែលបានអនុវត្តនូវតួនាទីភារកិច្ចទៅតាមបទបញ្ជារដែលដាក់ចុះ ក៏ដូចជាការអនុវត្តទៅតាមផែនការរបស់ថ្នាក់លើប្រគល់ជូន ប្រកបដោយភាពទទួលខុសត្រូវខ្ពស់ ដើម្បីបុព្វហេតុជាតិមាតុភូមិ និងប្រជាជន៕  

ជប៉ុន៖ ព្យុះទីហ្វុងមួយ បានបោកបក់ នៅភាគខាងត្បូងប្រទេសជប៉ុន ដោយបង្ខំឲ្យមានការជម្លៀស និងធ្វើឲ្យ គេហដ្ឋានមួយភាគបីនៅលើកោះអូគីណាវ៉ាដាច់ចរន្តអគ្គិសនី។ Khanun ដែលជាព្យុះទីហ្វុងទី៣ ដែលបានបោកបក់ នៅអាស៊ីខាងកើត ក្នុងរយៈពេលជាច្រើនសប្តាហ៍នេះ បានគំរាមកំហែងឲ្យមានភ្លៀងធ្លាក់ខ្លាំងបំផុត នៅទីក្រុងប៉េកាំង ក្នុងរយៈពេលជាងមួយសតវត្សរ៍ ហើយព្យុះនេះ បានបង្កជាទឹកជំនន់ ដែលបានសម្លាប់មនុស្សយ៉ាងហោចណាស់ ៣៤នាក់ ក្នុងប្រទេសចិនមកទល់ពេលនេះ។ ពាក់ព័ន្ធនឹងបាតុភូតធម្មជាតិនេះ អ្នកជំនាញនិយាយថា ព្រឹត្តិការណ៍អាកាសធាតុធ្ងន់ធ្ងរបែបនេះ នឹងកើតមានជាញឹកញាប់ ដោយសារតែការឡើងកម្ដៅផែនដី។ ព្យុះ Khanun កើតមានបន្ទាប់ពីព្យុះទីហ្វុងចំនួន ២ទៀត គឺ Talim និង Doksuri ដែលជាព្យុះដ៏ខ្លាំងមួយ ដែលបានបោកបក់លើប្រទេសហ្វីលីពីន និងតៃវ៉ាន់ផងដែរ ដោយបានសម្លាប់មនុស្សជាង ៣០នាក់ ក្នុងរយៈពេលប៉ុន្មានសប្តាហ៍ចុងក្រោយនេះ។ ព្យុះនេះ ត្រូវបានគេរំពឹងថា នឹងធ្លាក់មកលើឆ្នេរសមុទ្រភាគឦសានរបស់ប្រទេសចិន នៅថ្ងៃពុធ (ទី២ ខែសីហា) នេះ ប៉ុន្តែការព្យាករណ៍ឥឡូវនេះបាននិយាយថា វាទំនងជានឹងងាកឆ្ពោះទៅកាន់ដីគោករបស់ជប៉ុន ដោយមិនកាត់ប្រទេសចិនឡើយ។ កោះអូគីណាវ៉ាត្រូពិចរបស់ប្រទេសជប៉ុន ត្រូវបានគេរំពឹងថា នឹងប្រឈមជាមួយព្យុះ Khanun ដែលកម្លាំងខ្យល់បក់ខ្លាំងក្នុងល្បឿន ២៥២គីឡូម៉ែត្រ ក្នុងមួយម៉ោង នៅថ្ងៃពុធនេះ។ មនុស្សប្រហែល ២០.០០០នាក់ត្រូវបានណែនាំឲ្យជម្លៀសចេញ ហើយជើងហោះហើរជិត ៩០០ជើង ត្រូវបានលុបចោល នៅអាកាសយានដ្ឋានក្នុងក្រុង Naha របស់កោះអូគីណាវ៉ា។  ព្យុះឥទ្ធិពលខ្លាំងបែបនេះ កម្រកើតមានណាស់ ក្នុងរយៈពេលនេះនៃឆ្នាំ នៅប្រទេសជប៉ុន។ ប៉ុន្តែអ្នកវិទ្យាសាស្ត្រអាកាសធាតុ បានព្រមានជាយូរមកហើយថា ការឡើងកម្ដៅផែនដី នឹងធ្វើឲ្យព្យុះរឹតតែមានកម្លាំងខ្លាំង និងកើតមានញឹកញាប់ ព្រមទាំងបង្កើតនូវរលកកម្ដៅ ដែលបាតុភូតទាំង២ នេះ បានវាយប្រហារផ្នែកខ្លះនៃអាស៊ីកាលពីខែមុន៕

(តូក្យូ)៖ ខ្យល់ខ្លាំងបានកាត់ផ្តាច់ចរន្តអគ្គិសនីសម្រាប់ពលរដ្ឋជាង ២០០,០០០គ្រួសារ នៅតំបន់ទេសចរណ៍ដ៏ពេញនិយម គឺប្រជុំកោះអូគីណាវ៉ា នៅព្រឹក ថ្ងៃពុធនេះ (ម៉ោងក្នុងតំបន់) ខណៈព្យុះទីហ្វុងខានុន (Khanun) បោកបក់ទៅក្បែរកោះភាគនិរតីរបស់ប្រទេសជប៉ុន។ នេះបើយោងតាមការចុះផ្សាយដោយ ទីភ្នាក់ងារសារព័ត៌មាន AFP នៅថ្ងៃពុធ ទី២ ខែសីហា ឆ្នាំ២០២៣។ គិតមកទល់ពេលនេះ មានអ្នកស្លាប់ម្នាក់ និងរបួស ១១នាក់ហើយ។ ទីភ្នាក់ងារឧតុនិយមជប៉ុន បានរាយការណ៍ថា មនុស្សជិត ៧០០,០០០នាក់នៅក្នុងតំបន់ កោះអូគីណាវ៉ា ស្ថិតភាគនិរតីនៃរដ្ឋធានីតូក្យូ ត្រូវបានណែនាំឲ្យជម្លៀសចេញ ដោយព្យុះនេះបានផ្លាស់ទីទៅភាគពាយព្យក្នុងល្បឿន ១០គីឡូម៉ែត្រ ក្នុងមួយម៉ោង។ Okinawa Electric Power ដែលជាក្រុមហ៊ុនផ្គត់ផ្គង់អគ្គិសនីក្នុងតំបន់ បានឲ្យដឹងថា គ្រួសារចំនួន ២១២,៥៣០ ឬប្រហែល ៣៤ភាគរយនៃផ្ទះទាំងអស់ នៅលើកោះអូគីណាវ៉ា បានជួបប្រទះនឹងការដាច់ចរន្តអគ្គិសនី គិតត្រឹមម៉ោង ១០ និង៥៥នាទីព្រឹក ខណៈការផ្គត់ផ្គង់ថាមពលមានការថយចុះសម្រាប់ផ្ទះចំនួន ១០,០៣០ខ្នង នៃកោះអាម៉ាមី (Amami) ក្នុងខេត្តខាហ្កោស៉ីម៉ា (Kagoshima) ភាគខាងជើងនៃកោះអូគីណាវ៉ា។ រីឯ អាកាសយានដ្ឋានទីក្រុងណាហា ក៏ត្រូវបានបិទទាំងស្រុងនៅថ្ងៃពុធនេះ សម្រាប់ថ្ងៃទីពីរ។ ជើងហោះហើរសរុបចំនួន ៩៥១ ត្រូវបានលុបចោលកាលពីថ្ងៃអង្គារ និងថ្ងៃពុធ ហើយខ្សែរត់ស្រឡាង ចំនួន៣៥ ត្រូវផ្អាកប្រតិបត្តិការ។ គួរបញ្ជាក់ថា ព្យុះទីហ្វុង Khanun កំពុងវាយលុកប្រទេសជប៉ុន ក្នុងរដូវកាលទេសចរណ៍ដ៏មមាញឹកនៃរដូវក្តៅ ដែលឆ្នាំនេះចំនួនអ្នកទៅកម្សាន្តបាន និងកំពុង ត្រឡប់ទៅកម្រិតមុនពេលមានជំងឺកូវីដ ១៩។ ប្រជុំកោះអូគីណាវ៉ា តែងតែទទួលរងនូវឥទ្ធិពលដោយព្យុះទីហ្វុងជាញឹកញាប់ ជាពិសេសនៅក្នុងរដូវនេះតែម្ដង៕

  (ប៉េកាំង)៖ អាជ្ញាធរឧតុនិយមចិន បាននិយាយថាភ្លៀងដែលបានធ្លាក់លើទីក្រុងប៉េកាំង នារយៈពេលប៉ុន្មានថ្ងៃចុងក្រោយនេះ គឺជាភ្លៀងធ្លាក់ច្រើនបំផុត មិនធ្លាប់មានក្នុងរយៈពេល ១៤០ឆ្នាំមកនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃពុធ ទី២ ខែសីហា ឆ្នាំ២០២៣។ មន្ត្រីឧតុនិយមប្រចាំទីក្រុងប៉េកាំង បានគូសបញ្ជាក់នៅថ្ងៃពុធនេះដូច្នេះថា «កម្រិតអតិបរមានៃបរិមាណភ្លៀងធ្លាក់ដែលត្រូវបានកត់ត្រា អំឡុងព្យុះ មានដល់ ទៅ ៧៤៤.៨មីលីម៉ែត្រ នៅឯអាងស្ដុកទឹក វ៉ាងជីយ័ន (Wangjiayuan) ក្នុងទីក្រុងឆាងពីង (Changping)... ហើយនេះជាកម្រិតទឹកភ្លៀងធ្លាក់ច្រើនបំផុត មិនធ្លាប់មានក្នុងរយៈពេល ១៤០ឆ្នាំមកនេះ»។ គួរបញ្ជាក់ថា ព្យុះទីហ្វុង Doksuri បានបក់បោកក្នុងទិសដៅឆ្ពោះទៅភាគខាងជើង នៃប្រទេសចិន បន្ទាប់ពីបានវាយប្រហារលើខេត្តហ្វូជាំង (Fujian) នៃភាគខាងត្បូងប្រទេស កាលពីសប្ដាហ៍មុន និងក្រោយវាយប្រហារលើប្រទេសហ្វីលីពីន។ បើតាមប្រព័ន្ធផ្សព្វផ្សាយរដ្ឋចិនកាលពីថ្ងៃអង្គារ មនុស្សយ៉ាងហោច ១១នាក់បានស្លាប់ក្នុងគ្រោះទឹកជំនន់នៅទីក្រុងប៉េកាំង ខណៈ១៣នាក់បានបាត់ខ្លួន៕

(ទីក្រុងបាងកក)៖ នៅថ្ងៃទី ១១ ខែ សីហា ឆ្នាំ ២០២៣ ឯកឧត្តម គីម វីរៈ អគ្គលេខាធិការនៃគណៈកម្មាធិការជាតិគ្រប់គ្រងគ្រោះមហន្តរាយ បានដឹកនាំក្រុមការងារចូលរួមកិច្ចប្រជុំ ក្រុមប្រឹក្សាភិបាលនៃមជ្ឈមណ្ឌលគ្រប់គ្រងគ្រោះមហន្តរាយអាស៊ី នៅសណ្ឋាគា Athenee នៃទីក្រុងបាងកក ប្រទេសថៃ។  ក្នុងនាមជាប្រធានក្នុងអាណត្តិ ឯកឧត្តម គីម វីរៈ បានផ្តល់សន្ធរកថា បើកកម្មវិធី និងធ្វើការប្រកាសផ្ទេរតួនាទី ជាប្រធានក្រុមប្រឹក្សាភិបាល ជូនដល់សាធារណៈរដ្ឋប្រជាមានិតចិន ដែលត្រូវមានតួនាទីបន្តវេនជាប្រធាន។  កិច្ចប្រជុំនេះមានសមាជិកចូលរួមសរុបចំនួន ៣២ រូប មកពីតំណាង មជ្ឈមណ្ឌលគ្រប់គ្រងគ្រោះមហន្តរាយអាស៊ី និង មកពីតំណាងប្រទេសចំនួន ៩ ដែលសមាជិក។ ក្នុងនោះមានប្រទេសចំនួន ៧ ចូលរួមដោយផ្ទាល់ និង ប្រទេសចំនួន ២ ចូលរួមតាមប្រព័ន្ធអនឡាញ។

ភ្នំពេញ៖ នៅថ្ងៃទី៨ខែសីហា ឆ្នាំ២០២៣ម្សិលមិញ ឯកឧត្តម គីម វីរៈ អគ្គលេខាធិការនៃ គណៈកម្មាធិការ​ជាតិគ្រប់គ្រោះមហន្តរាយ បានជួបពិភាក្សាជាមួយគណៈប្រតិភូក្រុមការងារកង​ទ័ពជើងគោកភូមិន្ទថៃ ដែលដឹកនាំ​ដោយ​ឧត្តមសេនីយ៍​ឯក ភីផាត ជោវ៉ាតានាភីសា (PHIPAT JONGWATTANAPAISAL) និងអង្គភាពកិច្ចការសាធារណនៃកងទ័ពជើងគោកភូមិន្ទថៃ ដើម្បីសិក្សាស្វែងយល់ ​និងផ្តល់បទពិសោធន៍​រវាង​ប្រទេស​ទាំង​ពីរ​លើ​ការ​គ្រប់គ្រង​គ្រោះមហន្តរាយ។ ឯកឧត្តម គីម វីរៈ មានប្រសាសន៍ថា ប្រព័ន្ធការងាររបស់គណៈកម្មាធិការជាតិគ្រប់គ្រោះមហន្តរាយ មានតួនាទី និងភារកិច្ចឆ្លើយតបចំពោះគ្រោះមហន្តរាយកើតឡើង​ដោយយថា​ហេតុបង្ក​ដោយធម្មជាតិ និងមនុស្ស។ ឯកឧត្តម បន្តថា គណៈកម្មាធិការជាតិគ្រប់គ្រោះមហន្តរាយថ្នាក់ជាតិ​ជាសេនាធិការ​របស់​នាយក​រដ្ឋមន្រ្តី ដែលជាប្រធាន ​និងសម្របសម្រួលជាមួយក្រសួងស្ថាប័នពាក់ព័ន្ធនានារួមទាំងកង​កម្លាំង​ប្រដាប់អាវុធរហូតទៅដល់ថ្នាក់ក្រោមជាតិ និងមូលដ្ឋានផងដែរ។ នាឱកាសនោះ ឯកឧត្តម​ បានស្នើឲ្យមានការសហការនិងបន្តនៃកិច្ចសហប្រតិបត្តិការក្នុងការ​ទំនាក់ទំនង​នៃប្រទេសជាមិត្តឲ្យកាន់ជិតស្និត ​ក៏ដូចកងទ័ពនិងកងទ័ព​ ប្រជាជននិងប្រជាជន​ឲ្យអោយកាន់ស៊ីជម្រៅបន្ថែមទៀត ​ដើម្បីជួយគ្នាទៅវិញទៅមកក្នុងគ្រាអាសន្ន ឬ​មាន​ឧបទ្ទវហេតុ​ដោយគ្រោះធម្មជាតិ ​និងមនុស្សបង្កឡើង ។ ឧត្តមសេនីយ៏ឯក តំណាងកងទ័ពជើងគោកថៃ ​បានកោតសសើរ ​និងវាយតម្លៃខ្ពស់​ចំពោះ​គណៈកម្មាធិការជាតិ​គ្រប់គ្រោះមហន្តរាយ​ ដែលកន្លងមកដោយសង្កេតឃើញថា បាន​សម្រប​សម្រួល​ទាន់ពេលវេលា​ ក្នុងកាលៈទេសៈណាក៏ដោយ ថែមទាំងបានចូលរួមលើការងារ​សមយុទ្ធ​គ្រោះមហន្តរាយអាស៊ានជាមួយបណ្តាលប្រទេសជាមិត្តទៀតផង។ ភាគីទាំងពីរបាន​ សម្តែងនូវការគាទ្រនិងត្រៀមខ្លួនរួចជាស្រេច ដើម្បីបង្កើនកិច្ចសហប្រតិបត្តិការ​ទ្វេភាគី តាមរយៈការរៀបចំ​អនុស្សរណៈនៃការយោគយល់គ្នា ​ស្តីពីការផ្តល់ជំនួយសង្គ្រោះគ្រោះ​មហន្តរាយ, ​ការត្រៀមបង្ការពហុមុខសញ្ញាគ្រោះថ្នាក់, ​ការកាត់បន្ថយ និងប្រតិបត្តិការឆ្លើយ​តប​គ្រោះអាសន្ននាពេលខាងមុខ។ ​ភាគីថៃ ក៏បានសម្តែងនូវឆន្ទៈ ក្នុងកិច្ចសហប្រតិបត្តិការយ៉ាងជិតស្និទ្ធ​ជាមួយភាគីកម្ពុជា ក្នុងការពង្រឹងកិច្ចសហប្រតិបត្តិការរួមគ្នា ​សម្រាប់ភាពធន់នឹង​គ្រោះ​មហន្តរាយឆ្លងដែន​តាមរយៈកិច្ចព្រមព្រៀងអាស៊ានស្តីពីការគ្រប់គ្រងគ្រោះមហន្តរាយ និង​ការឆ្លើយតបសង្គ្រោះបន្ទាន់ (អាត់ម៉ែ) ឆ្នាំ២០២១-២០២៥៕ 

ភ្នំពេញ៖ នៅថ្ងៃទី៨ខែសីហា ឆ្នាំ២០២៣ម្សិលមិញ ឯកឧត្តម គីម វីរៈ អគ្គលេខាធិការនៃ គណៈកម្មាធិការ​ជាតិគ្រប់គ្រោះមហន្តរាយ បានជួបពិភាក្សាជាមួយគណៈប្រតិភូក្រុមការងារកង​ទ័ពជើងគោកភូមិន្ទថៃ ដែលដឹកនាំ​ដោយ​ឧត្តមសេនីយ៍​ឯក ភីផាត ជោវ៉ាតានាភីសា (PHIPAT JONGWATTANAPAISAL) និងអង្គភាពកិច្ចការសាធារណនៃកងទ័ពជើងគោកភូមិន្ទថៃ ដើម្បីសិក្សាស្វែងយល់ ​និងផ្តល់បទពិសោធន៍​រវាង​ប្រទេស​ទាំង​ពីរ​លើ​ការ​គ្រប់គ្រង​គ្រោះមហន្តរាយ។ ឯកឧត្តម គីម វីរៈ មានប្រសាសន៍ថា ប្រព័ន្ធការងាររបស់គណៈកម្មាធិការជាតិគ្រប់គ្រោះមហន្តរាយ មានតួនាទី និងភារកិច្ចឆ្លើយតបចំពោះគ្រោះមហន្តរាយកើតឡើង​ដោយយថា​ហេតុបង្ក​ដោយធម្មជាតិ និងមនុស្ស។ ឯកឧត្តម បន្តថា គណៈកម្មាធិការជាតិគ្រប់គ្រោះមហន្តរាយថ្នាក់ជាតិ​ជាសេនាធិការ​របស់​នាយក​រដ្ឋមន្រ្តី ដែលជាប្រធាន ​និងសម្របសម្រួលជាមួយក្រសួងស្ថាប័នពាក់ព័ន្ធនានារួមទាំងកង​កម្លាំង​ប្រដាប់អាវុធរហូតទៅដល់ថ្នាក់ក្រោមជាតិ និងមូលដ្ឋានផងដែរ។ នាឱកាសនោះ ឯកឧត្តម​ បានស្នើឲ្យមានការសហការនិងបន្តនៃកិច្ចសហប្រតិបត្តិការក្នុងការ​ទំនាក់ទំនង​នៃប្រទេសជាមិត្តឲ្យកាន់ជិតស្និត ​ក៏ដូចកងទ័ពនិងកងទ័ព​ ប្រជាជននិងប្រជាជន​ឲ្យអោយកាន់ស៊ីជម្រៅបន្ថែមទៀត ​ដើម្បីជួយគ្នាទៅវិញទៅមកក្នុងគ្រាអាសន្ន ឬ​មាន​ឧបទ្ទវហេតុ​ដោយគ្រោះធម្មជាតិ ​និងមនុស្សបង្កឡើង ។ ឧត្តមសេនីយ៏ឯក តំណាងកងទ័ពជើងគោកថៃ ​បានកោតសសើរ ​និងវាយតម្លៃខ្ពស់​ចំពោះ​គណៈកម្មាធិការជាតិ​គ្រប់គ្រោះមហន្តរាយ​ ដែលកន្លងមកដោយសង្កេតឃើញថា បាន​សម្រប​សម្រួល​ទាន់ពេលវេលា​ ក្នុងកាលៈទេសៈណាក៏ដោយ ថែមទាំងបានចូលរួមលើការងារ​សមយុទ្ធ​គ្រោះមហន្តរាយអាស៊ានជាមួយបណ្តាលប្រទេសជាមិត្តទៀតផង។ ភាគីទាំងពីរបាន​ សម្តែងនូវការគាទ្រនិងត្រៀមខ្លួនរួចជាស្រេច ដើម្បីបង្កើនកិច្ចសហប្រតិបត្តិការ​ទ្វេភាគី តាមរយៈការរៀបចំ​អនុស្សរណៈនៃការយោគយល់គ្នា ​ស្តីពីការផ្តល់ជំនួយសង្គ្រោះគ្រោះ​មហន្តរាយ, ​ការត្រៀមបង្ការពហុមុខសញ្ញាគ្រោះថ្នាក់, ​ការកាត់បន្ថយ និងប្រតិបត្តិការឆ្លើយ​តប​គ្រោះអាសន្ននាពេលខាងមុខ។ ​ភាគីថៃ ក៏បានសម្តែងនូវឆន្ទៈ ក្នុងកិច្ចសហប្រតិបត្តិការយ៉ាងជិតស្និទ្ធ​ជាមួយភាគីកម្ពុជា ក្នុងការពង្រឹងកិច្ចសហប្រតិបត្តិការរួមគ្នា ​សម្រាប់ភាពធន់នឹង​គ្រោះ​មហន្តរាយឆ្លងដែន​តាមរយៈកិច្ចព្រមព្រៀងអាស៊ានស្តីពីការគ្រប់គ្រងគ្រោះមហន្តរាយ និង​ការឆ្លើយតបសង្គ្រោះបន្ទាន់ (អាត់ម៉ែ) ឆ្នាំ២០២១-២០២៥៕ 

(ភ្នំពេញ)៖ ក្រសួងធនធានទឹក និងឧតុនិយម នៅព្រឹកថ្ងៃទី១១ ខែសីហា ឆ្នាំ២០២៣នេះ បានចេញព្រឹត្តបត្រព័ត៌មាន និងព្យាករណ៍កម្ពស់ទឹក នៅតាមបណ្តាស្ថានីយជលសាស្ត្រទាំង៨។ ស្ថានីយទាំង៨រួមមាន៖  ទី១៖ ទន្លេមេគង្គ-ស្ទឹងត្រែងទី២៖ ទន្លេមេគង្គ-ក្រចេះទី៣៖ ទន្លេមេគង្គ-កំពង់ចាមទី៤៖ ទន្លេបាសាក់-ចតុមុខទី៥៖ ទន្លេមេគង្គ-អ្នកលឿងទី៦៖ ទន្លេបាសាក់-កោះខែលទី៧៖ ទន្លេសាប-ព្រែកក្តាមនិងទី៨៖ ទន្លេសាប-កំពង់ហ្លួង សូមអានព្រឹត្តបត្រព័ត៌មាន និងព្យាករណ៍កម្ពស់ទឹកជំនន់ របស់ក្រសួងធនធានទឹក ពីស្ថានភាពកម្ពស់ទឹក នៅតាមបណ្តាស្ថានីយជលសាស្ត្រ ដូចខាងក្រោម៖

  (ភ្នំពេញ)៖ ឯកឧត្តម កិត្តិសង្គហបណ្ឌិត គន់ គីម ទេសរដ្ឋមន្ដ្រីទទួលបន្ទុកបេសកកម្មពិសេស និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្ដរាយ  និងថ្នាក់ដឹកនាំ  ព្រមទាំងមន្រ្តីរាជការនៃ គណៈកម្មាធិកាជាតិគ្រប់គ្រងគ្រោះមហន្តរាយ សូមអបអរសាទរដោយស្មោះ ជូនចំពោះឯកឧត្តមបណ្ឌិត ហ៊ុន ម៉ាណែត ក្នុងឱកាសដែលឯកឧត្តមបណ្ឌិត ត្រូវបានព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា បានត្រាស់បង្គាប់ផ្តល់គោរមងារ កិត្តិយសពិសេសដ៏ឧត្តុង្គឧត្តមបំផុត នៃរាជបណ្ឌិត្យសភាកម្ពុជា ជា «កិត្តិទេសាភិបាលបណ្ឌិត» តែមួយរូបគត់។ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត ពិតជាស័ក្តិសមបំផុត ចំពោះការទទួលបាននូវគោរមងារកិត្តិយសពិសេសដ៏ឧត្តុង្គឧត្តមបំផុត នៃរាជបណ្ឌិត្យសភាកម្ពុជា ជា «កិត្តិទេសាភិបាលបណ្ឌិត» នេះ ដោយឯកឧត្តមកិត្តិទេសាភិបាលបណ្ឌិត មានគុណបំណាច់ដ៏ថ្លៃថ្លា និងស្នាដៃដ៏ត្រចះត្រចង់ ក្នុងនាមជាយុវជនជំនាន់ថ្មី និងជាឥស្សរជនដឹកនាំដ៏ឆ្នើម របស់ព្រះរាជាណាចក្រកម្ពុជា ដែលពោរពេញទៅដោយសមត្ថភាព និងទេពកោសល្យខ្ពស់ ព្រមទាំងមានគុណធម៌ សីលធម៌ ព្រហ្មវិហារធម៌ ជាពិសេសបាននឹងកំពុងដឹកនាំ ធ្វើសកម្មភាពជាគម្រូ ជាក់ស្ដែងជាច្រើនឆ្នាំមកហើយ ទៅលើវិស័យសំខាន់ៗ ដើម្បីបុព្វហេតុ ជាតិ សាសនា និងព្រះមហាក្សត្រ។ យើងខ្ញុំ សូមលើកហត្ថបួងសួង វត្ថុស័ក្ដិសិទ្ធិទាំងឡាយ សូមជួយអភិបាលគ្រងរក្សា ប្រោះព្រំ ប្រសិទ្ធពរ បវរមហាប្រសើរ ជូនឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត និងលោកជំទាវ ព្រមទាំងគ្រួសារជាទីស្រឡាញ់ សូមបានប្រកបនូវព្រះពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ ជានិច្ចនិរន្តរ៍៕

ស្ទឹងត្រែង៖ មន្ត្រីមន្ទីរធនធានទឹក ខេត្តស្ទឹងត្រែង បានឱ្យដឹងថា ទឹកក្នុងដងទន្លេទាំង៤ បានហក់ឡើង ជាបន្តបន្ទាប់ ក្រោយមានភ្លៀងធ្លាក់ស្ទើររៀងរាល់ថ្ងៃ តែមិនទាន់បង្កឱ្យមានផលប៉ះពាល់ដល់ប្រជាពលរដ្ឋនោះទេ ។ លោក ប៉ាង ប៉េង ប្រធានមន្ទីរធនធានទឹក និងឧតុនិយម បានឲ្យដឹងថា កម្ពស់ទឹកទន្លេទាំង៤ ក្នុង ខេត្តស្ទឹងត្រែង គិតត្រឹមព្រឹកថ្ងៃទី៤ ខែសីហា នេះ គឺមិនទាន់មានការហក់ឡើងដល់កម្រិតប្រកាសឲ្យមាន ការប្រុងប្រយ័ត្ននៅឡើយទេ តែស្ថានភាពកម្ពស់ទឹក ដែលមានការឡើងជន់ខ្លាំង ចាប់តាំងពីថ្ងៃទី០១ និង ថ្ងៃ០២ ខែសីហា មក ដែលក្នុងរយៈពេលមួយយប់ៗ ទឹកបានឡើងជាងមួយម៉ែត្រ តែនៅថ្ងៃទី៣ និងថ្ងៃទី៤ ខែសីហា នេះ ទឹកបានថយបន្តិចវិញ នៅទន្លេសេកុង ។ លោកបានឱ្យដឹងថា ទឹកទន្លេមេគង្គ ព្រឹកថ្ងៃទី៤ ខែសីហា នេះ បានហក់ឡើងដល់ជាង៨ម៉ែត្រ ខណៈកម្រិតប្រកាសឱ្យប្រុងប្រយ័ត្ន កម្ពស់ជាង១០ម៉ែត្រ។ ទន្លេសេកុង នៅព្រឹកថ្ងៃនេះ ទឹកបានស្រក ចុះមកត្រឹម៩ម៉ែត្រ៧០ ហើយកម្រិតប្រកាសឲ្យមានការប្រុងប្រយ័ត្ន គឺជាង១១ម៉ែត្រ រីឯទន្លេសេសាន កម្ពស់ទឹក នៅព្រឹកថ្ងៃទី៤ ខែសីហា នេះ​ បានហក់ឡើងជិត៩ម៉ែត្រ ហើយកម្រិត​ទឹកប្រកាស​ឱ្យប្រុងប្រយ័ត្ន គឺ១០ម៉ែត្រកន្លះ ។ ការហក់ឡើង នៃកម្ពស់ទឹកតាមដងទន្លេក្នុងខេត្តស្ទឹងត្រែង រដ្ឋបាលខេត្ត ​មិនទាន់បានបញ្ជាក់ពី ផលប៉ះពាល់នៅតាមបណ្ដាភូមិ ឃុំ ស្រុក និងតាមតំបន់ទំនាបនៅឡើយទេ​ ប៉ុន្តែអាជ្ញាធរខេត្ត បានចេញ សេចក្ដីណែនាំ ​និងជូនដំណឹងដល់ប្រជាពលរដ្ឋ ​ដែលរស់នៅតាមដងទន្លេ ឲ្យមាន​ការប្រុងប្រយ័ត្ន និង ត្រៀមលក្ខណៈក្នុងការជម្លៀសទៅកាន់ទីទួលសុវត្ថិភាព ដែលអាជ្ញាធរតាមមូលដ្ឋានបានរៀបចំរួចរាល់៕អត្ថបទ៖ មាស ផល្លា